الاثنين، ١٦ أبريل ٢٠٠٧

خير اللهم اجعله خير


تررررن.....تررررن.........ترررن.....صوت منبه الموبيل بيرن علشان يصحيني الفجر .....صحيت وصليت وقلت اذكار الصباح وطلعت البيت علشان اصحي نور الدين (ابني) و حنين(بنتي) ومراتي حبيبتي كانت صاحية من الفجركلعادة وبتجهر الفطار علشان نفطر كلنا قبل ما اروح الشغل والولاد يروحوا مدرستهم....نظرة سريعة على الاخبار واحنا بفنطر.........ياه صحيح دا بقى فاضل اسبوعين على الانتخابات...اسبوعين بس والناس هتختار لاول مرة من زمن بعيد قوي المرشحين اللي هما عايزنهم بجد......والحكومة الجديدة طبعا هتمسك زي ماالناس كلها مستنية بدل الحكومة الانتقالية اللي اتشكلت من كافة الاتجاهات الساسية برئاسة اسامة الغزالي حرب لحد ماتتعمل انتخابات بعد موت حسني مبارك والاحداث السريعة العجيبة اللي حصلت بعد موته ونهاية عهده وعهد الحزب الوطني ومحاكمة اغلب رموزه الان بتهم الفساد وتبديد الاموال العامة غير المصايب التانية وانتهاك حقوق الانسان والتعذيب اللي انكشف وبيتحاكم دلوقتي كل اللي اشتركوا فيه وانتهاء عصر الدولة البوليسية الحقيرة الى الابد والسماح لكافة ال..ترررن....تررررن...الو ايوه يااستاذنا .بكرة....امتى..طيب ماشي .....بأذن الله....ده مسؤول المكتب الاداري بيبلغني بالمؤتمر الجماهيري الحاشد اللي هيتعمل في ميدان الاصلاح(التحرير سابقا) واللي اخوانا هيعلنوا فيه البرنامج السياسي بتاعنا اللي هندخل فيه الانتخابات وبيطلب مني تبليغ كل الاخوةبالتاكيد على اهمية الحضورلان كل اخوان مصر تقريبا هيحضروه باذن الله ......طبعا اللي هيعلن البرنامج الدكتور عصام العريان اللي فيه كلام كتير بيتقال انه باذن الله هو اللي هيشكل الحكومة لما ننجح في الانتخابات.....بس بصراحة المنافسة مش هتبقى سهلة مع وجود احزاب قوية دلوقتي زي الغد والوسط والكرامة و..و... مش زي زمان ......بس انا متاكد باذن الله ان الناس هتختار الحل الاسلامي خصوصا بعد الاحداث الاخيرة واللي شهدت صحوة اسلامية كبيرة باغلب دول المنطقة ووصل فعلا الاسلاميين للحكم في بعض منها....بس ياتري مين هيكون الرئيس بعد المستشار زكريا عبد العزيز (الرئيس المؤقت برضه) ...ياترى هيكون حد من اخوانا ولا مش شرط بس يكون شخصية محترمة وتستطيع تحمل المسؤلية وتملك صفات قيادية تلقى قبول من اغلب الاتجاهات هنشوف....وياتري مين هيمسك الداخلية ..ومين هيمسك الاعلام...ومين هيمسك الخار......احماااااااااااد...................اصحى يااحمد.......يلا يابني هيقيموا صلاة الفجر....قوم يلا....حاضر يابابا هقوم اهه.....ياه كان حتة حلم..........يلا خير اللهم اجعله خير
طلب:ياريت تكملوا الحلم معايا علشان ابويا صحاني قبل مايكمل

الاثنين، ٩ أبريل ٢٠٠٧

يلا بينا نحلم




ليه احلم معايا؟
احلم معايا علشان نحلم...ايوه نحلم...نحلم بكل حاجة واي حاجة...في زمن حتى الاحلام بقت صعبة فيه...نحلم على كيفنا بلا قيود...بلا حدود...
احلم معايا....لان احلامنا هي مستقبلنا....ولو عشنا من غيرمانحلم....مفيش حاجة هنوصل لها المهم علشان ماطولش عليكم انا طبعا هاحلم بشخصيتي وامنياتي ومرجعيتي(ايه الكلام الكبيرده) ...قصدي يعني اننا اكيد هنختلف واكيد برضه هنتفق .....بس المهم اننا نحلم......يلا غمض عينيك... واحلم معايا